O BIERZO NO DÍA DA GALIZA ´09.

O BIERZO NO DÍA DE GALIZA ´09,
Por Xabier Lago Mestre.

falaceibe@yahoo.es

Un ano máis o 25 de xullo celebramos o Día de Galiza en Compostela. Agardamos que hogaño haxa máis bercianos e bercianas ca nunca nas rúas da capital galega. Os bercianos non debemos esquecer os nosos vincallos cos veciños galegos, e por iso cómpre unha nova irmandade. Necesitamos a axuda da Galiza para defender a nosa cultura e lingua galegas. Os galegofalantes do Bierzo seguimos a ser discriminados, ante as administraciois públicas, os medios de comunicación, na internet e demais. Cando tentamos dar un paso adiante na normalización da nosa lingua sempre xorde un atranco que trata de empecer o noso avanzo idiomático. No fondo os censuradores do galego teñen medo a que recuperemos espazos de comunicación e de prestixio social. Eles só admiten a liberdade de expresión en castelán, e asoballan aos galegofalantes do Bierzo.

Non todo está estragado definitivamente, pois a razón, a lexitimidade e a xustiza están da nosa banda. Non conseguimos a declaración de cooficialidade do galego no Estatuto de Autonomía de Castela e León de 2007, pero haberá máis reformas estatutarias no futuro, e seguro que os galegofalantes demostraremos de novo a nosa resistencia fronte á imposición do monolingüismo. Agora soa unha nova revolta, a que supón a vindeira reforma do Estatuto do Consello Xeral Berciano. A Junta de Castela e León e as Cortes de Valladolid pretenden reformar a Lei pola que se creou en 1991 a única Comarca institucional da Comunidade Autónoma, por suposto, a do Bierzo.

Os galegofalantes do Bierzo xogámonos moito nesa nova reforma do Estatuto do Consello Xeral do Bierzo, vainos nelo as posibilidades de exercermos a nosa autonomía territorial, cultural e lingüística. O idioma galego debe ter recoñecemento institucional na futura Lei autonómica. Pretendemos que o galego poida ser utilizado polas administraciois locais (Consello Xeral Berciano, concellos e pedanías), de xeito parcial polo agora, xa que non posúe aínda o preceptivo recoñecemento de cooficialidade.

E nesta revolta sociocultural polos nosos dereitos lingüísticos os bercianos precisamos de toda a axuda que veña da Galiza. O 25 de xullo é o día da xuntanza festivaleira, do encontro cos amigos, do que xurdirá un novo pulo irmandiño ao abeiro co Bierzo, nesta xeira vindicativa que principiaremos ante as Cortes de Valladolid. Amosemos pois con fachenda as nosas bandeiras bercianas cruceiras polas rúas de Compostela, mentres berramos con forza Puxa O Bierzo Ceibe!.

O Bierzo, xullo de 2009.
www.obierzoceibe.blogspot.com

http://www.blogoteca.com/obierzoxa
http://www.ciberirmandade.org/falaceive
http://www.falaceibe.tk
http://www.partidodelbierzo.com/