A REIVINDICACIÓN GALEGUEIRA NO BIERZO.
REIVINDICACIÓN
GALEGUEIRA NO BIERZO.
Por Faladoiro.
Na rexión do
Bierzo resulta doado atopar pintadas reivindicativas nas paredes de moitas
vilas e localidades. Son expresión dun conflito cultural e político que existe
dende séculos. Nesas pintadas anónimas atopamos referencias políticas
(provincialismo), culturais (lingüísticas), sociais (manifas), ecolóxicas, etc.
Cada vez máis nas reivindicaciois
bercianas está presente a nosa bandeira Cruceira. Símbolo que nos reafirma
coletiva e territorialmente fronte a outras zonas veciñas (León, Castela…). As
pegadas e os repartos da nosa bandeira son frecuentes. A difusión da dita
bandeira é tal que supera claramente a outras bandeiras provinciais e
rexionais. Cantos máis nos identifiquemos coa Cruceira menos identificación
haberá con León e Castela.
A minoría galegofalante do Bierzo
está afastada dos medios de comunicación tradicionais (tv, radio, xornais…), e
outro tanto acontece cos medios de comunicación dixitais de hoxe. Velaí a
necesidade de atopar o noso espazo informativo nas chamadas redes sociais. Hai
de facer un esforzo para ter máis presenza na internet coa nosa lingua galega
tan asoballada polos poderes mediáticos, políticos e económicos.
Pódese compensar as debilidades da
minoría galegofalante cunha maior colaboración reivindicativa. Cómpre unir os
diversos coletivos para ter máis forza activista. Ademais, contar cos coletivos
da Galiza é fundamental para dar a coñecer a nosa problemática arredista na
Comunidade autónoma veciña. Prestixiar o galego é fundamental e para iso
contamos coa axuda dunha lingua internacional coma a portuguesa. Fuxamos do
illamento territorial e cultural!.
A mobilización reivindicativa
significa reforzar a presenza social. Non hai que ter medo a dar a cara nas
rúas e acadar maior protagonismo. O Bicentenario provincial berciano que
celebramos neste 2021permite esa mobilización. Deixo eiquí a proposta dunha ruada
con bandeiras Cruceiras en Vilafranca, cunha marcha entre o concello e a sede
da antiga deputación da provincia de Vilafranca. Para cando? para unha fin de
semana cercana ao 21 de setembro, data en que Vilafranca festexou a concesión
da capitalidade provincial en 1821.
Non se pode negar a existencia de
certos culturatas galegueiros que só recoñecen o galego elitista. Por iso
fomentan actividades culturais minoritarias, caso da edición de libros,
concertos, conferencias, etc. Estes culturatas pasan do galego social, rueiro e
reivindicativo. A razón desta estratexia é a súa dependencia do financiamento por
parte das instituciois, casos da Xunta de Galicia e da Deputación de León. Non queren desgustar a quen lles financia en
parte das súas actividades culturais. Por iso perden liberdade de expresión e
crítica, ademais de censurar e desprestixiar aos que temos alternativas
reivindicativas.
O galeguismo berciano ten que saber
relacionarse co bercianismo e o leonesismo. Hai clara evolución do bercianismo
político cara a recoñecer a importancia do idioma galego, admitir a provincia
galega tralo referendo democrático, relaciois políticas con Galiza, reforma do
Estatuto comarcal, etc. Podemos e debemos traballar xuntos a nivel
reivindicativo.
Pola outra banda, o galleguismo
berciano saberá confrontar co leonesismo. Esta ideoloxía política sempre atacou
o autonomismo político berciano, o fomento da nosa lingua galega, cuestiona a
nosa territorialidade, debilita a simboloxía identitaria berciana, etc. O
leonesismo demanda a segregación de Castela, mentres que o bercianismo e o
galleguismo berciano demandan a segregación de León. Hai unha confrontación
clara entre leonesismo e bercianismo e galeguismo que resulta definitorio.
Fomentar o bercianismo e o galleguismo significa derrotar ao leonesismo na nosa
rexión.
O Bierzo, agosto de 2021.
www.obierzoceibe.blogspot.com
posted by Xabier Lago Mestre at 5:06 a. m.
0 Comments:
Publicar un comentario
<< Home