POLO DEBATE POLÍTICO GALEGO-BERCIANO.
O DEBATE POLÍTICO GALEGO-BERCIANO,
Polo colectivo Fala Ceibe do Bierzo.
No Parlamento de Galicia vai ter
lugar a vindeira semana un debate dunha proposición non de lei (PNL),
presentada por el BNG, relacionada coa bisbarra do Bierzo. Esta proposta de
resolución ten varios contidos, como a
referencia á posibilidade de recuperar a provincia do Bierzo, á valoración da
integración do Bierzo na Galiza e á formación dun foro estable de diálogo entre
Galiza e O Bierzo.
Primeiro
cómpre lembraros que O Bierzo conmemora o 200 aniversario da súa provincia de
Vilafranca, creada durante o Trienio liberal (1820-1823). Esta provincia
integrou a bisbarra de Valdeorras e val do Visuña (Lugo). Sen embargo, O Bierzo
xa fora provincia antes, durante a Idade Moderna, trala creación desta
institución polos Reis Católicos (1486), despois de derrotar ao rebelde conde
de Lemos e segregar os seus territorios orientais. Ademais, a reivindicación
provincial berciana ten un carácter histórico que non rematou coas novas
provincias de 1833 e que chega até a actualidade.
A dita conmemoración provincial berciana de hoxe serve
para debater sobre a reorganización territorial. Referímonos a unha ampla zona
periférica que abrangue O Bierzo, Laciana, Valdeorras e as serras orientais de Lugo.
A orografía montañosa empece as boas comunicaciois. Os lindeiros políticos son
atrancos ao seu desenvolvemento económico. A mancomundiade de Valdeorras
fracasou en 2003, e mailas fundaciois comarcais (Valdeorras, Courel, Ancares…)
extinguíronse (2011). Así pois, segue a desarticulación institucional onde só perviven
pequenos concellos rurais. Só O Bierzo conseguíu o recoñecemento comarcal, por lei
autonómica de 1991, e aínda reivindica máis autogoberno.
Unha posibilidade é a recuperación da provincia do
Bierzo que supón outra articulación territorial alternativa á comarcal. Non se
pode negar que o recoñecemento provincial traería novos investimentos públicos.
Ademais, esta nova institución provincial adaptaríase á chamada área funcional
de Ponferrada que exerce a súa influencia económica sobre Valdeorras, Laciana e
este de Lugo. Cómpre articular este amplo territorio con novas comunicaciois e
servizos sanitarios, escolares, culturais, etc.
O Bierzo non pode estar máis tempo illado por ser
periferia da Comunidade autónoma de Castela e León. Hai que trocar de dinámica
territorial cun achegamento a Galiza. A creación dun foro interinstitucional é
fundamental para debater sobre a procura de soluciois. Hai moito que traballar
nas materias comúns (comunicaciois, medio ambiente, sanitarias, turismo, etc).
Non se pode admitir que os lindeiros políticos rematen coas estradas,
esnaquicen os parques naturais, dividan a lingua galega, impidan os traslados
sanitarios, etc.
Pola outra banda, no Bierzo aínda seguimos a
reivindicar o recoñecemento dos nosos dereitos lingüísticos a falarmos galego.
Esta irmandade cultural secular non se pode rachar polas políticas
uniformizadoras castelás que nos asoballan. Galiza non pode esquecer as
bisbarras galegofalantes do Eonavia, O Bierzo e Seabra. Está en xogo o destino
da única comunidade lingüística do noroeste peninsular. Todos xuntos temos a
obriga de manter o noso patrimonio idiomático común para as novas xeraciois.
No Bierzo somos moitos os que nos sentimos tamén galegos
con fachenda. As enquisas sociolóxicas sempre recollen importantes porcentaxes
de bercianos que apoian a súa quinta provincia galega. Por suposto que a
normativa constitucional impón un procedemento legal moi difícil para calquera
reforma provincial, mediante aprobación por lei orgánica. Incluso haxa que
agardar mellores conxunturas políticas, caso da segregación da provincia de
León de Castela e León, para reclamar tamén a anexión territorial do Bierzo.
Mais a reivindicación provincial segue viva despois de rematar coa provincia do
Bierzo en 1833, por algo será!.
Por todo o comentado, agardamos con ilusión que o
vindeiro debate político no Parlamento galego sexa receptivo á problemática
territorial do Bierzo. Porque necesitamos apoio da Galiza para ter un maior
desenvolvemento territorial. Non podemos seguir illados na periferia de Castela
e León. Queremos ser protagonistas do noso futuro cun maior poder institucional
propio, caso da reclamación provincial.
O Bierzo, 16 de febreiro de 2021.
www.obierzoceibe.blogspot.com
posted by Xabier Lago Mestre at 7:35 a. m.
0 Comments:
Publicar un comentario
<< Home