O BIERZO TAMÉN RECLAMA O NOSO GALEGO.

O BIERZO TAMÉN EN GALEGO.

Por Xabier Lago Mestre.

Non se pode negar que hai moito descoñecemento sobre a reivindicación do galego nos territorios estremeiros. Neste caso, dende o coletivo cultural Fala Ceibe do Bierzo, queremos informar do que reivindicamos na nosa rexión. Concretamente, fixarémonos na estratexia empregada coa última campaña a prol da presenza do galego no Consello comarcal do Bierzo.

O Consello Comarcal é a institución de goberno na rexión do Bierzo. Foi creado no ano 1991 por lei autonómica. O dito Consello colabora con tódolos concellos e mailas pedanías. Até hoxe o galego non ten presenza no labor político do Consello por iso a nosa campaña vindicativa. Cando se consiga o uso parcial do galego polo Consello, o noso idioma terá unha visibilidade e un prestixio especial para o resto de entes locais.

Hai anos que andamos detrás do Consello Comarcal para que o idioma galego teña uso institucional mais até hoxe só temos as súas promesas. O Consello comenta que hai unha proposta de convenio de colaboración coa Xunta de Galicia para o fomento do galego no Bierzo. Chegou a hora de presionar máis. Por iso principiamos unha campaña ante os medios de comunicación para reclamar que no portal dixital do Consello apareza o galego xa.

A NOVA CAMPAÑA RECLAMATIVA.

Por suposto, na nosa reivindicación tivemos moi en conta a lexislación lingüística. Así contamos coa Constitución, o Estatuto de Autonomía de Castela e León (art. 5.3), Carta europea de linguas rexionais e minoritarias, Ley autonómica de creación do Consello comarcal do Bierzo (1991) e diversas sentenzas sobre o eusquera en Trebiño. Sen embargo, cremos que a presión mediática foi máis forte e convincente ca xurídica ante a caste política resistente.

A nosa campaña tivo grande repercusión mediática en León, O Bierzo e Galiza. Case que tódolos xornais, en papel e dixitais, fixéronse eco da nosa demanda lingüística. Isto foi abraiante! Quizais tiña axudado o contexto de combate político das vindeiras elecioes locais do ano 2019. O importante é que a nosa mensaxe sobre o galego chegou a moitos leitores e ouvintes.

Antes de seguir convén facer un apuntamento interesante. No Bierzo ben sabemos que a minoría galegofalante sofre continuas discriminacioes lingüísticas ante a maioría castelán. Os poderes políticos, institucionais, económicos e informativos marcan as regras do xogo. Tras longas reclamacioes acadamos pequenas concesioes porque avanzamos paseniño ante a cadencia que nos impón o poder castelán.

RESULTADOS DA REIVINDICACIÓN.

Trala dita campaña mediática polo uso do galego no Consello Comarcal chegan os resultados. A presión mediática e dos falantes, mediante a remesa de cartas ao dito Consello, foi importante segundo nos contaron. Incluso o chamado Procurador do Común de Castela e León (Valedor do Pobo rexional) abriu un expediente informativo tralas demandas.

O Consello Comarcal semella reacionar ante a presión social. Así acadamos xa un pequeño acordo verbal. Este coletivo Fala Ceibe remesará varias series de léxico galegoberciano para que sexan publicitadas no portal dixital do Consello. Traballaremos de balde para facilitar a presenza imediata do galego. Xa non haberá que agardar máis para que se traduza parte do portal dixital comarcal ao galego dende Galiza. Esperamos que o noso traballo altruista sirva para que o Consello cumpra finalmente co prometido connosco.

Resulta de grande importancia que o galego teña presenza no portal dixital do Consello Comarcal. Así o galego consegue un protagonismo institucional e visibilidade social. A chave está en demandar que o galego nesta insltitución non caia no formalismo xurídico con meras traducioes dos contidos atuais en castelán. Procuraremos que o galego no susodito portal sexa algo vivo e prático para os galegofalantes. Esta luita non será doada porque os políticos de turno de seguro que tratarán todo o contrario, que teña mínima presenza sen eficacia xurídica.

O Consello Comarcal é a máis importante institución territorial do Bierzo. Mais hai outros entes locais, casos dos concellos e pedanías (xuntas veciñais nas localidades). Non é que o Consello Comarcal teña moitos cartos nin competencias mais menos teñen os concellos rurais e pedanías. Por iso resulta fundamental que o Consello axude no fomento do galego ao resto das institucioes locais bercianas.

Non podemos permitir que este novo galego institucional sirva só aos políticos para asinar convenios de colaboración e contratos administrativos que procuran gastos sen eficacia xurídica para os galegofalantes. Porque hai uns dereitos lingüísticos que agardan ser recoñecidos aos bercianos e as bercianas. No futuro utópico non poderá haber diferenzas entre os falantes galegos da Galiza administrativa e do Bierzo estremeiro.

O Bierzo, xullo de 2018

www.facebook.com/javierlagomestre

http://sites.google.com/site/obierzoxa http://www.facebook.com/xabierlagomestre www.twitter.com/obierzoxa http://www.blogoteca.com/obierzoxa http://obierzoceibe.wordpress.com http://www.ciberirmandade.org/falaceive www.ponferrada.org www.partidodelbierzo.es