O GALEGO DO BIERZO TEN FUTURO NA INTERNET
Por Xabier Lago Mestre.
O noso idioma galego loita acotío por ter o seu posto na internet. Nesta arañeira procúrase ofrecer informacióis axeitadas e interesantes para a ampla audiencia rexional, nacional e internacional. Por suposto, son os internautas da Galiza os que teñen un protagonismo especial no fomento do noso idioma estremeiro. Dende O Bierzo tamén intentamos achegar o noso gran de area con moito esforzo individual e colectivo.
Non se pode negar que a presenza do galego na internet berciana aínda causa sorpresa por uns e, en menor medida, tamén rexeito doutros. Os prexuízos antigalegos seguen presentes nun sector da poboación berciana. Prexuízos que tardarán en desaparecer porque a presenza do galego nas novas tecnoloxías supón unha novidade difícil de asumir aínda.
Paga a pena reflexionar sobre o que provoca a nova entrada do galego nas casas a través das novas tecnoloxías da información. O desprestixiado galego, rural e labrego, agora entra sen permiso nos computadores dos bercianos e dos internautas en xeral. Non pode ser! Dirán moitos e moitas. Quen lle deu permiso?.
Internet posibilita que o galego chegue máis lonxe e a máis cidadáns. Teñamos pois a habilidade para ofrecer unha boa pegada inicial aos que reciben a nosa lingua. Neste sentido utilizamos a estratexia de ofrecer unha primera imaxe positiva e fermosa do galego. Se o noso idioma entra polos ollos de moitos internautas que descoñecen o galego, que reciban un impacto visutal moi bo e abraiante que non poidan rexeitar.
Hai que vencellas as imaxes galegueiras con temas de interese berciano, casos das tradicióis, turismo rural, fotos antigas, fala popular, arquitectura labrega, toponimia, costumes etnográficas, etc. Que o galego acompañe fotos de interese social é básico. Outro tema é axudar a tomar conciencia colectiva da represión ou coerción que o galego sufriu, por ejemplo durante a época da ditadura franquista, prohibición do ensino galego, falta de oficialidade histórica dos idiomas rexionais, etc. Hai que espertar as conciencias individuais e colectivas, tendo moi claro que estes procesos duran moito tempo e os resultados a curto prazo escasean.
A presenza do galego na internet obriga aos seus usuarios a debater cos castelanfalantes que rexeitan este idioma. Estas polémicas non soen ser pacíficas porque a mentalidade prexuiceira non deixa razoar ben aos opositores. Os argumentos bilingües priman sempre sobre os que rexeitan o galego. Máis pronto que tarde os opositores recúan ante a argumentación bilingüe. Temos que saber ter paciencia e non perder as formas ante as ofensas que non tardan en chegar, como dicimos, pola falta de razoamento axeitado. A boa estratexia galegueira serve para defenderse ante os contrarios pero tamén ante os que están caladiños, á espreita. Estes tamén participan no xogo dialéctico, hai que telo en conta e pensar en eles, no momento de non perder as formas. Podes convencer, pero se perdes as formas, estás derrotado, non deixes que esto pase pois serás mirado con lupa.